Віншуем з Днём настаўніка!
З сардэчнай цеплынёй і душэўным хваляваннем віншуем вас з прафесійным святам — Днём настаўніка!
Шаноўныя калегі!
Паважаныя ветэраны педагагічнай працы!
Гэтае свята звязана для ўсіх нас са шчырай падзякай педагогам за іх самаадданую працу, з нашымі надзеямі на падрастаючае пакаленне, на іх мэтанакіраванасць, прагу да ведаў.
Зычым вам, шаноўныя, моцнага здароўя, жыццёвай утульнасці, шчаслівага сямейнага ўладкавання. Будзьце строгімі і спагадлівымі, мудрымі і справядлівымі, перакананымі заўзятарамі сваёй прафесіі. Няхай светлыя промні Вашых добрых і справядлівых вачэй вернуцца Вам шчаслівымі імгненнямі шчырага задавальнення ад працы!
На роспач не маеш права, 
Хаваеш слабасць і стому.
Твая нялёгкая справа
Жыццё адкрываць другому.
Любові навучыць адданай
Да роднай пявучай мовы,
Што з песні жытоў саткана,
Са звону гусляў вясновых.
Любові да роднага краю,
Да песень і казак матулі,
Сівых курганоў ля гаю,
Дзе мудрыя продкі паснулі.
У працы не маеш права:
На роспач,
на слабасць,
На стому.
Твая пачэсная справа —
Жыццё адкрываць другому.
(Алена Руцкая)
