Праз гульню да сацыяльнай рэчаіснасці
Сюжэтна-ролевую гульню можна смела назваць школай сацыяльных адносін.
Выхавальнікі дашкольнай адукацыі ясляў-сада № 24 г. Ліда прапанавалі дзецям сюжэтна-ролевыя гульні, робячы акцэнт на іх сучаснасць і актуальнасць, якія садзейнічаюць фарміраванню ўяўленняў у дзяцей аб прафесіях людзей, прыладах іх працы, матэрыялах, неабходных для стварэння прадметаў. 
Гуляючы ў сюжэтна-ролевую гульню “Салон прыгажосці”, выхаванцы знаёмяцца з работай візажыста, стыліста, цырульніка. У сюжэтна-ролевай гульні “Ветэрынарная лячэбніца “Айбаліт” дзеці вучацца дзейнічаць з мікраскопам, медыцынскімі карткамі жывёл, рэцэптамі.
Не застаецца без увагі дзяцей сюжэтна-ролевая гульня “Турагенства”, у якой прапануюцца пуцёўкі не толькі ў іншыя краіны, але і па старонках Беларусі, роднага горада Ліды: “Ліда – гістарычная”. Трапіўшы ў банк, выхаванцы знаёмяцца з работай кансультанта, інкасатара, кіраўніка, касіра. Гуляючы ў сюжэтна-ролевую гульню “Атэлье”, дзеці могуць быць і мадэльерам, і закройшчыкам, і швачкай, а наведвальнікі аформіць заказ на пашыў прыгожай вячэрняй сукенкі, спадніцы, штаноў, ім прапануюцца розныя віды і колеры тканіны, таксама ў міні-кутку ёсць гардэробная, дзе ўжо вельмі шмат пашыта рэчаў для лялек.
Праз гульню дзеці паглыбляюць і сістэматызуюць уяўленні пра сучасныя прафесіі, абавязкі работнікаў розных сфер і, увогуле, пра акаляючую рэчаіснасць. Сюжэтна-ролевыя гульні даюць магчымасць дашкольнікам удзельнічаць у сацыяльным жыцці, вырашаць канфлікты і ўмець дамаўляцца, выражаць свае эмоцыі і адэкватна ўзаемадзейнічаць з аднагодкамі.
